ऋण असुली समस्याले बैंकहरूको नाफा १३ प्रतिशत घट्यो, खराब कर्जा बढ्यो

७ वैशाख, काठमाडौं । २० वाणिज्य बैंकहरुले चालु आर्थिक वर्षको साउनदेखि चैत मसान्तसम्मको वित्तीय विवरण सार्वजनिक गरेका छन् । सार्वजनिक वित्तीय विवरणअनुसार यी बैंकहरुको खुद नाफा गत आर्थिक वर्षको सोही अवधिको तुलनामा १३.४६ प्रतिशतले घटेको छ ।

चालु आर्थिक वर्षको ९ महिनामा २० वाणिज्य बैंकले ४० अर्ब ६८ करोड रुपैयाँ खुद नाफा कमाएका छन्, जबकि गत आर्थिक वर्षको यसै अवधिमा ४७ अर्ब १ करोड कमाएका थिए ।

वाणिज्य बैंकहरुमध्ये ८ बैंकको नाफा बढेको छ भने १२ को घटेको छ । नाफा बढाएका बैंकहरुमा कृषि विकास, एभरेस्ट, नेपाल इन्भेस्टमेन्ट मेगा, प्राइम, हिमालयन, लक्ष्मी सनराइज र सिद्धार्थ बैंक छन् । कृषि विकास बैंकको सबैभन्दा धेरै ९७ प्रतिशत नाफा बढेको छ भने नेपाल बैंकको सबैभन्दा धेरै ९२ प्रतिशतले नाफा घटेको छ ।

९ महिनामा वाणिज्य बैंकहरुमध्ये नविलले सबैभन्दा धेरै ४ अर्ब ६६ करोड खुद नाफा कमाएको छ । यद्यपि सो बैंकको नाफा पनि ८.७ प्रतिशतले घटेको हो । सोही अवधिमा नेपाल बैंकको नाफा सबैभन्दा कम १३ करोड रुपैयाँ छ । बैंकहरुको नाफामा आएको गिरावटले लगानीकर्ताको संभावित प्रतिफलमा समेत असर पार्ने देखिएको छ ।

कुन बैंकको नाफा कति ?

किन घट्यो बैंकहरुको नाफा ?
बैंकहरुको नाफा घट्नुमा समयमै कर्जा रकम असुली नहुनु मुख्य कारण रहेको माछापुच्छ्रे बैंकका सीईओ सन्तोष कोइराला बताउँछन् । ‘समयमै रिकभरी नहुँदा प्रोभिजन बढ्न गयो, त्यसले सिधा नाफामा हिट गर्‍यो’ उनले भने । औद्योगिक तथा व्यापारिक क्षेत्र, घरजग्गा कारोबार, सेयर बजारमा देखिएको शिथिलताले समग्र बैंकिङ क्षेत्रमा रिकभरीको समस्या निम्तिएको छ ।

बैंकमा धितो राखिएका सम्पत्ति बिक्री गरेर बैंकहरुले कर्जा अशुली गर्न सक्ने व्यवस्था छ । तर बैंकमा राखिएका सम्पत्ति पनि बिक्री नभएको अवस्था छ । ‘व्यवसायमा देखिएको शिथिलताले साँवा ब्याज नउठ्ने, धितो राखिएको सम्पत्ति पनि बिक्री नहुने समस्याले प्रोभिजन रकम बढ्यो’ कोइरालाले भने ।

समयमै उठ्न नसकेको साँवा तथा ब्याज रकम (निष्क्रिय कर्जा) बढेको बैंकहरुकै वित्तीय विवरणले पुष्टि गर्छ । बैंकहरुले समयमै उठाउन नसकेको साँवा तथा ब्याज रकम नै चैत मसान्तसम्म कुल कर्जामा ३.७२ प्रतिशत पुगेको छ । गत आर्थिक वर्षको चैतसम्म यस्तो कर्जा २.९९ प्रतिशत थियो ।

१० बैंकको निष्क्रिय कर्जा ४ प्रतिशत नाघेको छ । ग्लोबल आईएमई, नेपाल इन्भेस्टमेन्ट मेगा, कुमारी, प्राइम, माछापुच्छ्रे, हिमालयन, लक्ष्मी सनराइज, नेपाल बैंक, नविल बैंक र राष्ट्रिय वाणिज्य बैंकको निष्क्रिय कर्जा ४ प्रतिशत नाघेको छ ।

ऋणीले तिर्नुपर्ने साँवा तथा ब्याज रकम (किस्ता)मा ३ महिनाको भाखा नाघेमा सो रकम निष्क्रिय कर्जामा वर्गीकरण हुन्छ । निष्क्रिय कर्जालाई खराब कर्जा भन्ने गरिएको छ, तर राष्ट्र बैंकले कर्जाको वर्गीकरणका क्रममा भाखा नाघेको १ वर्ष पूरा भएपछि मात्रै खराब कर्जाका रुपमा व्याख्या गरेको छ ।

भाखा नाघेको समय घर्किँदै जाँदा बैंकहरुले सोका लागि लोन लस प्रोभिजन पनि बढाउँदै जानुपर्ने व्यवस्था छ । भाखा नाघेको १ वर्ष पूरा भएमा शत प्रतिशत लोन लस प्रोभिजन गर्नुपर्ने व्यवस्था छ, त्यसले बैंकहरुको नाफामा असर परेको हो ।

वितरणयोग्य नाफा ऋणात्मक :
बैंकहरुको खुद नाफाको रकम पोजेटिभ देखिए पनि सेयरधनीलाई वितरण गर्न मिल्ने नाफा भने ऋणात्मक छ । धेरैजसो वाणिज्य बैंकहरुको चैत मसान्तसम्म वितरणयोग्य नाफा ऋणात्मक भएको छ । चैत मसान्तसम्म २० वाणिज्य बैंकहरुको औसत वितरणयोग्य नाफा नै ९ अर्ब ५३ करोड ऋणात्मक छ । चैत मसान्तसम्म ९ बैंकको वितरणयोग्य नाफा ऋणात्मक छ ।